దర్శకుడు: సందీప్,సుజిత్

సినిమా శైలి:Telugu, Suspense, Thriller

వ్యవధి:2 Hrs 31 Min

కిరణ్ అబ్బవరం వరుస పెట్టి సినిమాలు వదులుతూ ఉంటాడు. ఏంటబ్బా అన్నీ రొటీన్ చిత్రాలేనా? అని అనుకుంటున్న టైంలో క అంటూ డిఫరెంట్ మూవీతో ఆడియెన్స్ ముందుకు వచ్చాడు. టీజర్, ట్రైలర్‌లతోనే అందరిలోనూ భారీ అంచనాలు క్రియేట్ చేశాడు. ప్రమోషనల్ కంటెంట్‌తోనే క మూవీ మీద అందరికీ ఇంట్రెస్ట్ క్రియేట్ చేశారు. మరి ఈ చిత్రం ఎలా ఉంది? కిరణ్ అబ్బవరంకు సరైన హిట్టుని ఇచ్చిందా? లేదా? అన్నది చూద్దాం.

కథ
వాసుదేవ్ (కిరణ్ అబ్బవరం) అనాథ. చిన్నతనంలో అనాథ ఆశ్రమంలోని మాస్టర్ గురునాథం (బలగం జయరామ్) వద్దున్న డబ్బుని కాజేసి బయటపడతాడు. ఎదుటి వాళ్ల ఉత్తరాలు చదువుతూ తన సొంత వాళ్లే రాసినట్టుగా ఫీల్ అవుతుంటాడు వాసుదేవ్. అలాంటి వాసుదేవ్ కృష్ణగిరి ప్రాంతానికి వచ్చి పోస్ట్ మేన్ ఉద్యోగంలో జాయిన్ అవుతాడు. రంగారావు (అచ్యుత్ కుమార్) వద్ద జాబులో జాయిన్ అవుతాడు. రంగారావు కూతురు సత్యభామ (నయని సారిక)ని ప్రేమిస్తాడు. ఆమె కూడా వాసుదేవ్ ప్రేమలో పడుతుంది. అదే ఊర్లో రాధ (తన్వి రామ్) టీచర్‌గా పని చేస్తుంటుంది. ఇక ఆ ఊర్లో అమ్మాయిలు కనిపించకుండా పోతుంటారు. ఆ ఊర్లో అమ్మాయిల మిస్సింగ్ వెనకాల ఉన్నది ఏంటి? ఉత్తరాలు చదివే అలవాటు వల్ల వాసుదేవ్‌కు వచ్చిన సమస్యలు ఏంటి? ఆ ఊర్లో లాలా, అబిద్ షేక్‌ల పాత్ర ఏంటి? అసలు ఈ కథను ముందుకు నడిపే ఆ ముసుగు వ్యక్తి ఎవరు? అన్నది థియేటర్లో చూడాల్సిందే.

క మూవీ గురించి ఎంత చెబితే.. అంత స్పాయిలర్స్ అవుతాం. కథ ప్రారంభం కాస్త గందరగోళంగానే అనిపిస్తుంది. ఆ మిషన్ ఏంటి?.. ఆ ముసుగు వ్యక్తి ఎవరు?.. అసలు ఏం జరుగుతోంది? అంటూ ఇలా నెమ్మదిగా, కాస్త బోరింగ్‌గానే కథ ముందుకు వెళ్తుంటుంది. అయితే కొంత మంది ముందే ఆ ముసుగు వ్యక్తి ఎవరు? అన్నది గెస్ చేస్తారు. కానీ ఆ వ్యక్తి అలా ఎందుకు ఉన్నారు? అన్నది మాత్రం గెస్ చేయలేరు.పాయింట్ పరంగా క చాలా కొత్తగా ఉంటుంది. అసలు ఇంత వరకు ఇలాంటి పాయింట్‌ను ఎవ్వరూ టచ్ చేయేలేదోమో అన్నట్టుగా ఉంది. ఈ పాయింట్‌లో అన్ని రకాల అంశాలుంటాయి. కమర్షియల్ యాంగిల్ కూడా ఉంది. కావాల్సినంత హీరోయిజం పెట్టారు. యాక్షన్, రొమాన్స్, పాటలు, కొన్ని చోట్ల కామెడీ ఇలా అన్నీ కలగలపి ఉంటాయి. అయితే ఇందులో పెద్ద సస్పెన్స్, థ్రిల్లింగ్ మూమెంట్స్ మాత్రం ఎక్కువగా ఉండవు. విలన్ ఎవరు అన్నది అర్థం అవుతుంది. కానీ చివర్లో ఇచ్చే ట్విస్ట్‌కు మైండ్ బ్లాక్ అవుతుంది.

ఇలా కూడా ఆలోచిస్తారా? ఇంత బాగా తీశారేంట్రా బాబు అని థియేటర్ నుంచి ఆడియెన్ బయటకు వెళ్తాడు. కానీ అదొక్కటే సినిమాకు సరిపోదు కదా. ఫస్ట్ హాఫ్ అంతా సాదాసీదాగా ఎక్కడా వావ్ మూమెంట్స్ లేనట్టుగా సాగుతుంది. ఇంటర్వెల్‌కు ఇచ్చిన ట్విస్ట్ బాగుంటుంది. ఇక సెకండాఫ్‌లో అయినా కథ ఎంగేజింగ్‌గా ఉంటుందా? అని అనుకుంటారు. కానీ ప్రేక్షకుడి ఊహకు సాగేలానే కథ ఉంటుంది. ఈ మూవీ ప్రాణం అంతా కూడా చివరి 20 నిమిషాల్లోనే ఉంటుంది. అక్కడే దర్శకులుగా, రచయితలుగా సందీప్, సుజిత్‌లు తమ మార్క్, కొత్తదనాన్ని చూపించారు. అదొక్కటే ఈ మూవీని కాపాడుతుంది. మిగతాదంతా కూడా సిల్లీగానే కనిపిస్తుంది. ఎక్కడా అవాక్కయ్యేలా ఒక్క మూమెంట్ కూడా కనిపించదు.

టెక్నికల్‌గా ఈ చిత్రం బాగానే ఉంది. టీం పడిన కష్టం తెరపై కనిపిస్తుంది. విజువల్స్ బాగున్నాయి. ఆర్ట్ వర్క్ కూడా మెప్పిస్తుంది. మరీ పూర్తిగా ఆ కాలానికి తీసుకెళ్లలేకపోయినా.. ఆ ఫీల్‌ను మాత్రం తెప్పిస్తారు. క్యాస్టూమ్స్ పరంగానూ ఓకే అనిపిస్తుంది. ఈ మూవీకి క్లైమాక్స్ కాకుండా.. శ్యామ్ సీఎస్ ఇచ్చిన ఆర్ఆర్ కూడా ప్రధాన బలంగా నిలుస్తుంది. కొన్ని పాటలు వినడానికి, చూడటానికి బాగున్నాయి. ఆర్ఆర్ మాత్రం సినిమాకు ప్రాణంగా నిలిచింది. మాటలు కొన్ని చోట్ల మనుసుని హత్తుకుంటాయి. క్వాలిటీ మూవీని చూసిన ఫీలింగ్ అయితే కలుగుతుంది. కిరణ్ అబ్బవరం కెరీర్‌లో ది బెస్ట్ మూవీగా అయితే చెప్పొచ్చు.

కిరణ్ అబ్బవరం నటుడిగా ఎంతో మెరుగయ్యాడనిపిస్తుంది. ఈ మూవీలో అన్ని రకాల ఎమోషన్స్‌ను పలికించే ప్రయత్నం చేశాడు. కాస్త నెగెటివ్ టచ్ కూడా ఇచ్చినట్టుగా అనిపిస్తుంది. డైలాగ్ డెలివరీలో ఇది వరకటి సినిమాలకంటే బెటర్ అయ్యాడనిపిస్తుంది. హీరోయిన్ నయన్ పాత్ర పాటలకే పరిమితం అన్నట్టుగా ఉంది. తన్వి రామ్‌కు కాస్త ఇంపార్టెంట్ రోల్ దక్కినట్టు, నటనకు స్కోప్ ఉన్న కారెక్టర్ లభించినట్టు అనిపిస్తుంది. బలగం జయరామ్, అచ్యుత్, రెడిన్ కింగ్ స్లే, శరణ్య ప్రదీప్, అజయ్ వంటి పాత్రలు ఓకే అనిపిస్తాయి.

‘క’ మూవీ రివ్యూ – KA Review Rating 3/5